नेपाली कच्चा पदार्थबाट बनेको झोलामा बजेट पुस्तिका, स्वदेशी उत्पादन प्रवद्र्धनलाई निरन्तरता

अर्थमन्त्री विष्णप्रसाद पौडेलले नेपाली कच्चा पदार्थबाट निर्माण गरिएको झोलामा बजेट पुस्तिका राख्ने प्रचलनलाई निरन्तरता दिएका छन् । बिहीबार संसदमा बजेट प्रस्तुत गर्दा उनले स्वदेशी झोलामा बजेट पुस्तिका राखेका थिए । पूर्वअर्थमन्त्री वर्षमान पुनले चालु आर्थिक वर्ष २०८१/०८२ को बजेट पुस्तिका गाँजाबाट निर्मित नेपाली झोलामा राखेका थिए । नेपाली उत्पादनलाई प्रवद्र्धन गर्ने उद्देश्यले त्यसो गरिएको उनले बताएका थिए । यसअघि विदेशी छालाबाट निर्मित महंगो ब्रिफकेश’ मा बजेट पुस्तिाका राख्ने गरिएको थियो । अर्थमन्त्रीले प्रयोग गरेको झोला अघिल्लो वर्षकै जस्तो देखिए पनि नयाँ झोला भएको अर्थ मन्त्रालयले जनाएको छ । अर्थमन्त्रीका प्रेस सल्लाहकार भुवन केसीले नेपाली उत्पादनलाई प्रोत्साहन गर्ने नीतिअनुसार नै स्थानीय उत्पादनबाट बनेको झोलामा बजेट पुस्तिका राखिएको बताए । ‘हेर्दा अघिल्लो वर्षको जस्तै देखिए पनि बजारबाट नयाँ किनेर ल्याएको हो । त्यतिबेला र अहिलेकोमा केही फरक छ । तर झोला नेपाली हो । नेपाली उत्पादन प्रवद्र्धन गर्ने प्रचलन जसले गरेको भए पनि निरन्तरता दिनुपर्छ भन्ने हो’, केसीले भने ।