महेन्द्रनगर ,कञ्चनपुर जिल्लामा पनि विश्व दुग्ध दिवस मनाईएको छ । आईतबार भेटेरीनरी अस्पताल तथा पशु सेवा विज्ञ केन्द्र कञ्चनपुरको आयोजनामा २३औ विश्व दुग्ध दिवस मनाईएको हो ।
‘दुधको खपत बढाऔ अर्थतन्त्रलाई सवल बनाऔ’ भन्ने मुल नाराका साथ कञ्चनपुर जिल्लामा पनि भव्यताका साथ विश्व दुग्ध दिवस मनाईएको भेटेरीनरी अस्पताल तथा पशु सेवा विज्ञ केन्द्रका कार्यालय प्रमुख श्याम सिंह खड्काले बताए ।
विश्वमा दुग्ध क्षेत्रले पोषण तथा खाद्य सुरक्षण एवम् जीविकोपार्जनमा पुर्याएको योगदानको कदर गर्दै दूधको उपभोगमा वृद्धि गर्न संयुक्त राष्ट्रसङ्घको खाद्य तथा कृषि सङ्गठन (एफएओले) सन् २००१ जुन १ देखि विश्व दूध दिवस मनाउन थालिएको हो । आम जनताबीच दूधको उपभोग गर्न चेतना फैलाउने उद्देश्यले नेपालले पनि सन् २०११ देखि विश्व दूध दिवस मनाउन थालेको हो ।
दैनिक गुणस्तरीय दूध पिउन चेतना जगाउने, पोषणयुक्त दूध तथा दुग्ध पदार्थको उपभोग वृद्धि गर्न प्रचार–प्रसार गर्ने, दूध तथा दुग्ध पदार्थको गुणस्तर कायम गर्न चेतना जगाउने र दूध तथा दुग्ध पदार्थको उपभोगमा सबैको पहुँच पुर्याउन पहल गर्ने उद्देश्यले यो दिवस मनाउने गरिन्छ ।
कार्यक्रममा भेटेरीनरी अस्पताल तथा पशु सेवा विज्ञ केन्द्र कञ्चनपुरमा कार्यरत कर्मचारी तथा भेटेरीनरी विषय अध्ययनरत विद्यार्थी लगायत सरोकारवाला पक्षको सहभागिता रहेको भेटेरीनरी अवस्पतालका अधिकृत दिर्धकुमार स्वारले बताए ।