कञ्चनपुर, असार २२ राष्ट्रिय स्वतन्त्र पाटी(रास्वपा) नेतृत्वको सरकारले भ्रष्टाचार र बेथिति बिरुद्ध एक्सनमा उत्रिएको छ । भ्रष्टाचार र बेथिति बिरुद्ध सरकारले सशस्त्र प्रहरी बलभित्रको अनियमितता बेथिति सशस्त्र प्रहरी बलले सञ्चालन गरेको कीर्तिपुरस्थित विद्यालयमा ११ करोड हिनामिना गरेको आरोपमा इन्स्पेक्टरसहित दुईजना पक्राउ परेका छन् ।
लेखा अधिकृत रहेकी इन्स्पेक्टर कल्पना गुरुङ र उनका साथी लीला लामालाई काठमाडौं प्रहरीले शनिबार पक्राउ गरेको हो ।इन्स्पेक्टर गुरुङले आफ्नो साथी लामाको खातामा विद्यालयको रकम ट्रान्सफर गराएर हिनामिना गरेकी हुन् । सशस्त्र प्रहरीले यस विषयमा डिआइजीको नेतृत्वमा छानबिन गरेको थियो ।
छानबिन समितिको प्रतिवेदनका आधारमा सशस्त्र प्रहरीले उनीहरूलाई पक्राउ गरी कारबाही गर्न पत्राचार गरेको थियो ।जिल्ला प्रहरी परिसर, काठमाडौंका एसएसपी दिलीप घिमिरेका अनुसार सशस्त्र प्रहरीकै पत्रका आधारमा दुईजनालाई पक्राउ गरिएको हो । ‘सशस्त्र प्रहरीबाटै आएको पत्रका आधारमा दुईजनालाई पक्राउ गरेर अनुसन्धान थालेका छौँ,’ उनले भने, ‘विद्यालयको रकम हिनामिना गरिएको भन्ने विषय छ, विस्तृत हेर्दै छौँ ।
’ स्रोतका अनुसार यसमा आपराधिक लाभसँगै सम्पत्ति शुद्धीकरणको कसुरमा समेत अनुसन्धान गर्न लागिएको छ ।हिनामिनामा सशस्त्रका अन्य उच्च अधिकारी पनि तानिने सम्भावना छ । इन्स्पेक्टर गुरुङले ६ वर्ष लगातार सो स्कुलमा लेखापाल भएर काम गरेकी थिइन् । उनी एक्लैबाट यति ठुलो रकम हिनामिना सम्भव नभएको स्रोत बताउँछ ।
सशस्त्र प्रहरीले डिआइजी युवराज अर्यालको नेतृत्वमा छानबिन समिति गठन गरेको थियो । इन्स्पेक्टर गुरुङले गैरकानुनी रूपमा संगठनको पैसा अपचलन गरेको समितिको निष्कर्ष छ ।पैसा अपचलनमा सघाउने लामा इन्स्पेक्टरका निकस्टस्थ व्यक्ति हुन् । उनको लाजिम्पाटमा रेस्टुरेन्ट र ट्राभल एजेन्सी छ । इन्स्पेक्टर गुरुङलाई प्रभावमा पारी विद्यालयको पैसा उनले आफ्नो व्यवसायमा लगाएका थिए ।
केही समयपछि फिर्ता गर्ने आश्वासनमा पैसा निकालेको, तर डुबेपछि फिर्ता गर्न नसकेको खुलेको छ । छानबिनका क्रममा दुवैले पैसा अपचलन गरेको स्विकारेका छन् । पैसा फिर्ता गर्न समय दिइएको नसकेपछि फौजदारी मुद्दा प्रक्रिया अघि बढेको हो । लामा आपराधिक पृष्ठभूमि भएका व्यक्ति हुन् । उनी विगतमा डकैती र लागुऔषधजस्ता मुद्दामा पक्राउ परेका थिए ।यो प्रकरणमा विद्यालयका तत्कालीन कमान्डेन्टहरू दिग्विजय सुवेदी, भूपेन्द्र केसी र रामजंग पाण्डे पनि छानबिनमा छन् ।
सुवेदी हाल डिआजी, केसी एसएसपी र पाण्डे एसपी छन् । यद्यपि, उनीहरूको प्रत्यक्ष संलग्नता देखिएको छैन ।विद्यालयबाट कल्याण कोषमा पठाउनुपर्ने पैसा ढिलो गरी इन्स्पेक्टर गुरुङले व्यक्तिगत खातामा पटक–पटक ट्रान्सफर गराएकी थिइन् । यसमा सशस्त्र प्रहरीको कल्याण शाखाका कर्मचारीको भूमिकामाथि समेत छानबिन हुने भएको छ । वर्षौँसम्म विद्यालयको आम्दानी खोजबिन नहुनुले कल्याण शाखाको मिलेमतो आशंका गरिएको हो ।
कतिपय अवस्थामा कल्याण कोषको खातामा पैसा नै जम्मा नगरी जम्मा गरिएको भौचर पठाउने गरिएको थियो । वर्षौँसम्मको लेखापरीक्षणमा समेत यो विषय लुकाइएको थियो ।साथै, बैंकको समेत मिलेमतोको आशंका गरिएको छ । एनआइसी एसिया बैंकको कीर्तिपुर शाखामा विद्यालयको खाता छ । लाजिम्पाटको शाखाबाट सधैँ पैसा निकालिएको छ ।
प्रक्रिया पूरा नगरी रकम निकालिएको समेत छानबिनबाट खुलेको छ । नागरिक स्तरबाट सशस्त्र प्रहरी भित्रको राशन घोटाला अनियमितता छानबिनको समेत माग उठिरहेको छ । सीमावर्ती क्षेत्रमा रातदिन खटिने सशस्त्र प्रहरीका तल्ला स्तरका कर्मचारी घर पठाएर राशन कुम्लाउने संस्कृतिमा ब्रेक लगाउनुपर्नेमा जोडदिईएको छ । यसरी जनताले विश्वास गरेको सशस्त्र प्रहरीबाटै यस्तो बेथिति हुन थालेपछि नागरिक स्तरबाट समेत सशस्त्र प्रहरीमा हुने भ्रष्टाचार अनियमिताबारे प्रशन उठाईरहेका छन । नयाँ पत्रिकाबाट